សមត្ថកិច្ចបង្ក្រាបបាន គោយន្តកែច្នៃដឹកឈើ៥គ្រឿង
ខេត្តកំពង់ធំ ៖ លោកវរសេនីយ៍ត្រី ឃុន ភារៈ មេបញ្ជាការកងរាជអាវុធហត្ថស្រុកស្ទោងបានប្រាប់ថា គោយន្តកន្ត្រៃ៥គ្រឿងដឹកឈើត្រូវបានកម្លាំងរបស់លោកឃាត់ចាប់បានកាលពីវេលាម៉ោង៨ និង១០នាទីយប់ថ្ងៃទី០១ ខែធ្នូ នៅចំណុចត្រពាំងឡប ស្រុកស្ទោង លុះព្រឹកថ្ងៃទី០២ ខែធ្នូ ២០១៧ បានប្រគល់ឲ្យមន្ដ្រីជំនាញសង្កាត់រដ្ឋបាលព្រៃឈើស្ទោងធ្វើការវាស់វែង និងរក្សាទុកដែលមានឈើប្រភេទឈើទាលចម្រុះចំនួន១២,៦៦៥ម៉ែត្រគូប ចាត់វិធានការតាមច្បាប់។
ពាក់ព័ន្ធនឹងការបង្ក្រាបគោយន្តកន្ត្រៃដឹកឈើខាងលើនេះ លោក ឈឿង គុណ នាយផ្នែករដ្ឋបាលព្រៃឈើស្ទោងបាននៅថ្ងៃទី០៣ ខែធ្នូ ឆ្នាំ២០១៧នេះថា ក្រោយពីបាននាំគោយន្តដឹកឈើមកដោះស្រាយ នៅសង្កាត់រដ្ឋបាលព្រៃឈើស្ទោង ក៏មានប្រជាពលរដ្ឋមានគ្នាជាង៣០នាក់ មកសុំយកទៅវិញថាឈើនេះដឹកយកទៅធ្វើផ្ទះ និងដោយសារមានការអន្ដរាគមន៍ពីថ្នាក់លើ ដោយថាពួកគាត់ពុំមានលទ្ធភាពក្នុងកាបង់ផាកពិន័យនោះទេ។
ហេតុដូច្នេះហើយពួកគាត់ក៏បានធ្វើកិច្ចសន្យាប្រគល់ឈើឲ្យសមត្ថកិច្ចជំនាញយកមករក្សាទុកចុះ ចំណែកគោយន្តពួកគាត់បានសុំយកទៅប្រើប្រាស់វិញ ពីព្រោះអ្នកខ្លះគាត់ពិតជាយកឈើទៅធ្វើផ្ទះពិតប្រាកដមែន ហើយអ្នកខ្លះទៀតបានទៅចងការលុយគេមកទិញគោយន្ត ដោយយល់ពីផលលំបាកនេះហើយទើបថ្នាក់លើអនុគ្រោះដល់ពួកគាត់៕
No comments