ចាប់បានទាំងអស់បែបនេះគេចទៅណារួច
ខេត្តកំពង់ធំ ៖ កងរាជអាវុធហត្ថស្រុកបារាយណ៍ឃាតខ្លួនជនល្មើស២នាក់ លួចប្រើប្រាស់ឧបករណ៍នេសាទខុសច្បាប់(ឆក់ត្រី)ថ្ងៃទី០១ ខែធ្នូ ឆ្នាំ២០១៧ ប្រគល់ឲ្យមន្ដ្រីជំនាញសង្កាត់រដ្ឋបាលជលផលបារាយណ៍ដើម្បីកសាងសំនុំរឿងចាត់ការតាមនីតិវិធីច្បាប់ ។
ប្រភពពីសមត្ថកិច្ចបានឲ្យដឹងថា ជនសង្ស័យទាំងពីរនាក់រួមមានទី១-ឈ្មោះ អ៊ីម អេង ភេទប្រុស អាយុ៣៧ឆ្នាំទី២-ឈ្មោះ វ៉ាត ណែម ភេទប្រុស អាយុ៣១ឆ្នាំ ទាំង២នាក់រស់នៅភូមិលេខ១ ឃុំចំការអណ្ដូង ស្រុកចំការលើ ខេត្តកំពង់ចាមរួមជាមួយ និងវត្ថុតាង ម៉ូតូ០១គ្រឿង ដុំភ្លើងឆក់០១ អាគុយ០១ ដងឆក់០១គូរ និងត្រី០៥គីឡូក្រាម ។
លោក ប៉ែន វណ្ណារិទ្ធ នាយខណ្ឌរដ្ឋបាលជលផលកំពង់ធំប្រាប់ថា កាលពីថ្ងៃទី០២ ខែធ្នូនេះ កម្លាំងលោកបានសហការជាមួយកម្លាំងសឹករងស្រុកកំពង់ស្វាយប៉ុស្តិ៍នគរបាលផាត់សណ្តាយ នគរបាលប្រឆាំងបទល្មើសសេដ្ឋកិច្ច នគរបាលចរាចរណ៍ផ្លូវទឹក កងទ័ពជើងទឹកចុះប្រតិបត្តិការបង្ក្រាបបទល្មើសជលផលធ្វើការព័ទ្ធចាប់ និងឃាត់ខ្លួនបានជនសង្ស័យម្នាក់ទៀតឈ្មោះ សេន អាស្សី ភេទប្រុស អាយុ៣៧ឆ្នាំ មានទីលំនៅភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង ធ្វើនេសាទដោយឧបករណ៍ឆក់ត្រី នៅចំណុចព្រែកតាប៉ា ភូមិកោះតាពៅ ឃុំផាត់សណ្តាយ ស្រុកកំពង់ស្វាយ ចំណែកពីរនាក់ទៀតបានលោតចុះទឹករត់គេចខ្លួនបាត់ កម្លាំងយើងដកហូតបាន បាឡាជ័រភ្ជាប់ម៉ាស៊ីនម៉ាកឆ្លាម០១គ្រឿង ដុំភ្លើងឆក់០១គ្រឿង ខ្សែកាបចំនួន០៨ ខ្សែ អាគុយ០១គ្រឿង និងត្រី០២គីឡូក្រាម ។
លោកក៏បានសំណូមពរដល់បងប្អូនប្រជាពលរដ្ឋទាំងអស់ សូមកុំឲ្យនាំគ្នាប្រើប្រាស់ឧបករណ៍នេសាទខុសច្បាប់តទៅទៀត ពីព្រោះវានាំឲ្យមានទោសចំពោះមុខច្បាប់ ជាពិសេសគឺឧបករណ៍ឆក់ត្រីនេះតែម្តងដែលច្បាប់ហាមដាច់ខាតមិនឲ្យប្រើប្រាស់នោះទេ កាលណាប្រើវាប្រៀបបានដូចជាបំផ្លាញសម្បត្តិធនធានធម្មជាតិរបស់យើងទាំងអស់គ្នា ៕
No comments