អាណិតណាស់ ជួសជុលសាលាឆាន់សុខៗ របូតដៃធ្លាក់តែម្តង
រាជធានីភ្នំពេញ ៖ យុវជនគម្នាក់មានមុខរបរជាជាងសំណង់ បានស្លាប់បាត់បង់ជីវិតក្រោយពេលបញ្ជូនទៅសង្គ្រោះបន្ទាន់ដល់ពាក់កណ្ដាលផ្លូវ បន្ទាប់ពីជនរងគ្រោះឡើងទៅជួសជុលដំបូលសាលាឆាន់កម្ពស់ជាង១០ម៉ែត្រនៅក្នុងវត្តអង្គសម្ពលី ស្ថិតនៅក្នុង ភូមិចំការជោ ឃុំពើក ស្រុកអង្គស្នួល ខេត្តកណ្ដាល កាលពីវេលាម៉ោង១១និង៣០នាទីថ្ងៃត្រង់ថ្ងៃទី០២ ខែធ្នូ ឆ្នាំ២០១៧ ។
នគរបាលស្រុកអង្គស្នួលបានឲ្យដឹងថា យុវជនរងគ្រោះឈ្មោះង៉ែត ប្រុស អាយុ១៨ឆ្នាំ ជនជាតិខ្មែរ ស្រុកកំណើតនៅក្នុងភូមិរកា ឃុំរកា ស្រុកកណ្តាលស្ទឹង ខេត្តកណ្តាល និងបានស្នាក់នៅជាមួយព្រះសង្ឃរយៈពេល៧ឆ្នាំមកហើយ គឺតាំងពីកុមារភាពមកម្លេះ ។ យុវជនខាងលើនេះជាមនុស្សគ ប៉ុន្តែបានធ្វើជាជាងសំណង់ ប៉ុន្តែមួយរយៈពេលចុងក្រោយនេះធ្វើការជួសជុលដំបូលសាលាឆាន់នៅក្នុងវត្ត ។ នៅមុនពេលកើតហេតុ យុវជនរងគ្រោះរួមជាមួយជាងសំណង់ផ្សេងទៀត បាននាំគ្នាឡើងទៅជួសជុលដំបូលសាលាឆាន់នោះមានកម្ពស់ជាង១០ម៉ែត្រ ខណៈនោះស្រាប់តែរបូតដៃបណ្ដាលឲ្យធ្លាក់រងរបួសយ៉ាងធ្ងន់ធ្ងរ ។ ពេលនោះមិត្តភក្ដិរួមការងារព្រមទាំងព្រះសង្ឃនៅក្នុងវត្តបានទៅមើល និងដឹកទៅកាន់មន្ទីរពេទ្យបង្អែកស្រុកអង្គស្នួល ដើម្បីសង្គ្រោះបន្ទាន់ភ្លាមៗដែរ ប៉ុន្តែពេលទៅដល់គ្រូពេទ្យនៅទីនោះបានប្រាប់ថា ជនរងគ្រោះរងរបួសធ្ងន់ធ្ងរណាស់ ។ បន្ទាប់មកក្រុមគ្រូពេទ្យបង្អែកស្រុកបានយករថយន្តពេទ្យដឹកជនរងគ្រោះទៅកាន់មន្ទីរពេទ្យនៅរាជធានីភ្នំពេញបន្តទៀត ប៉ុន្តែពេលទៅដល់ពាក់កណ្ដាលផ្លូវជនរងគ្រោះបានស្លាប់ទើបដឹកសពត្រឡប់ក្រោយវិញ ហើយនាំយកទៅធ្វើបុណ្យតាមប្រពៃណីនៅក្នុងវត្តអង្គសម្ពលីនោះវិញ ។
ក្រោយពេលកើតហេតុកម្លាំងនគរបាលប៉ុស្ដិ៍ពើកបានសហការណ៍ជាមួយកម្លាំងនគរបានព្រហ្ម ទណ្ឌ និងនគរបាលបច្ចេកទេសស្រុកចូលរួមពីមន្ត្រីក្រុមប្រឹក្សាឃុំ លោកគ្រូពេទ្យ និងលោកមេភូមិ ព្រមទាំងសាច់ញាតិ និងព្រះសង្ឃក្នុងវត្តផង បានធ្វើការពិនិត្យកោសល្យវិច្ច័យសពតែម្តង ៕
No comments